Presidenti Ilir Meta thotë se ditët e izolimit për shkak të koronavirusit po i kalon mes shtëpisë dhe zyrës, ndërsa shton se e ka pasur shumë të vështirë “zakonin e ri” për të mos dhënë dorën.
“Unë kohën e kaloj mes zyrës dhe shtëpisë ku po rri këto ditë. Përpiqem të kem sa më pak kontakte dhe të mos jap dorën. E kam pasur shumë të vështirë të përshtatem me këtë zakon. Por po kryej dhe detyrat e mia si Presidenti dhe kryetar i shtetit”, u shpreh Meta në një intervistë për Eni Vasilin.
I pyetur nga gazetarja për fëmijët, kreu i shtetit u shpreh se të tre fëmijët janë në Shqipëri dhe normalisht janë kufizuar, sipas tij, puthjet dhe përqafimet me ta. “Të gjithë fëmijët janë këtu. Në karantinë. Vazhdojnë mësimet në distancë dhe po e kalojnë me qetësi, vetëm nuk ka shumë puthje e përkëdhelje si gjithë të tjerët”, u shpreh ai.
Më tej, Presidenti tregoi se testin e koronavirusit e bëri pasi kishte qenë në një palestër ku kishte qenë një person i infektuar me koronavirus. Sipas Metës, ai e kishte bërë testin më shumë sepse kishte shqetësim ngaqë kishte takuar Ministren e Shëndetësisë dhe Task-Forcën për covid-19.
“Jam shumë i lumtur që e bëra testin, ndoshta s’duhet ta bëja, por mora info ku kisha qenë në palestër me një qytetar që kishte rezultuar pozitiv. Ndërkohë, unë kisha vendosur të dhuroja gjak se kishte një apel për të ndihmuar të sumurët talasemikë.
Kisha vetëm një shqetësim, se dy ditë më parë kisha takuar Ministren e Shëdnetësisë dhe të gjithë task-forcën e Ministrisë dhe kisha takuar dhe shumë të tjerë se u kisha dhënë dorën shumë të tjerëve. Pra shqetësimi ishte se mund të kisha shkaktuar pasoja te gjithë të tjerët”, përmbylli Presidenti Ilir Meta.
