Sipas Organizatës Botërore të Shëndetësisë, të prekurit nga koronavirusi kanë kaluar 300 mijë personat. Konkretisht janë 308.594 të infektuar dhe 13 069 të vdekur, edhe pse shifrat i referohen gjithmonë gjendjes e të paktën 24 orëve më parë. Rreth një miliard persona gjenden në kushtet e karantinës në shtëpi. Ndërsa 96 mijë persona janë shëruar.
Përtej gjendjes së Italisë, që tashmë mbetet fronti më i nxehtë në botë dhe ku dje viktimat ishin 793, fronti tjetër që shqetëson të gjithë është Spanja, që po regjistron një ngritje vertikale të rasteve, me ritme edhe më të shpejta se Italia. Në 21 ditë nga rasti i parë, vendi mesdhetar regjistron rreth 25 mijë raste, 5 mijë vetëm në 24 orët e fundit, ku shtohen edhe 324 të vdekur më shumë.
Pavarësisht planit 822 miliardë eurosh për t’ u përballur me virusin, në Gjermani rastet kanë arritur në 16.600, ndërkohë që numrat po rriten edhe në Zvicër dhe Lihtenshtein (6113).
Por OBSH është thellësisht e alarmuar edhe nga lajmet e fundit që vijnë nga Afrika, kontinent ky që ishte prekur shumë pak deri në pak ditë më parë.
Tashmë rastet kalojnë 1000 personat, dhe fakti më shqetësues është që përfshihen në pandemi 40 nga 54 vendet e kontinentit, ku pasojat e COVID -19 mund të jenë shumë herë më dramatike se në Europë, nga mungesa e strukturave shëndetësore.
![](https://adrena.news/wp-content/uploads/2020/03/drama-e-koronavirusit-13-mije-te-vdekur-308-mije-te-infektuar-dhe-mbi-1-miliard-ne-karantine.jpg)