Drejtori i spitalit të Kavajës, Përparim Daiu, i ka kushtuar një status në rrjete sociale, bashkëqytetarit të tij, Nebiut 43-vjeçar që humbi jetën një ditë më parë nga koronavirusi, në Spitalin Infektiv në QSUT.
Sipas drejtorit Daiu, Nebiu ishte një djalë i qeshur e me zemër të madhe dhe kishte pajisur kohët e fundit pediatrinë e spitalit me perde, dyshekë, kondicionerë etj.
“Për emrin që ke lënë e për gjithçka ke bërë për shokët, miqtë të afërm, ke bërë diçka që ky qytet e çdo prind do të kujtojë… për ne miqtë e tu do ngelesh gjithmonë Nebi, çuni flori me zemër të madhe. Shpirti yt qofte i xhehnetit”,– shkruan drejtori i spitalit të Kavajës.
43-vjeçari u nda ditën e hënë nga jeta duke u bërë pacienti i katërt që humb jetën nga koronavirusi në vendin tonë dhe njëkohësisht pacienti me moshën më të re. Sipas mjekëve, ai nuk vuante nga asnjë patologji, përveçse ishte obez.
